قلبى مهوش عصفور

سلام عليكم فى اول مشاركة ليا فى المنتدى حبيت اقدملكم قصيدة لراجل عزيز على قلبى و نفسى ارد بيها ولو حتى على ذرة من اللى عمله معايا وانا متأكد انى لو عشت طول عمرى مش هردله حتى الذرة دى .... على فكرة فى ناس هتعرف صاحب القصيدة اول ما تقراها........يارب القصيدة تعجبكم

قلبي مهوش عصفور

الليل براح
والغُنا مش مستباح
ما تُقطفيش م القلوب الخُضر
وشّك التفاح
ما تُشطبيش وش القمر
وما تزْعَليش منى
لو كان كلامى البسيط
مش قَد أحلامك
ما انا طيرك المستخبّى
فى جـْناحاته الريش
وأنا الدرَويش
وانا الوتر اللى ما بيعزفش
غير إسمِك
وانا اللى راسمِك شجر
فى ربيعى اللى ما بيطرَحْش
من كام سنة للنهارده
باعشقِك حواديت
ما ينامش جفنى غير على سيرتِك
أفضل أضُمِّك فى عينى زى فرض الفجر
يحضُن دموعك نبض قلبى الحيّ
أهمس فى وش النهار الجيّ
يضحكلك
والضُم مشاعرى بدهشتك لبلاب
من كام سنة للنهاردة بيعشقك صوتى؟!!
عِشقك وطن وحياة
وانا موتى فى سكوتِى
وبرغم عمرى اللى عدى
سنينه سَرقانى
باحْبِى واجيلك زيّ طفل رضيع
عِشقك فى قلبى سَما
مفطوم على غُناكى
شِعرى بمشاعرك صور
من نبع تكوينى
يا قلعتى ومركبى
ومايّتى وطينى
عشقِك بيحيينى
من نِن عينى اشرقى
بدموعى وضّينى
قلبى اللى حَب الغُنا
أكيد مهوش عصفور
يقدر يطِير فى السما
يفْتَح طاقات النور
كان قلبى سوُر إنما
من بعد ما عشقتِك
إحساسى من دهشتى
خادنى لطريق مسحور
ما انا طيرك المستخبى
فى جناحاته الريش
وانا الدرَويش
وانا الوتر اللى ما بيعزفش غير إسمِك
وانا اللى راسمِك شجر
فى ربيعى اللى ما بيطرَحْش
***

شكرا على القصيدة وانا فى انتظار المزيد يا حسون

لو حاولت أن اصف لك ما بقلبي من حب لنفذت جميع أوراق العالم

عمنا يا عمنا ارحم شويه قلبتا
انا باعترف ان صاحب الكلام دا فنان
انت بجد نشنت
بالتوفيق