"بعدك حبيبى " تأليف ميما ...

بعدك حبيبى

نفسى اضمك يا حبيبى بين اديا ..................... واحكيلك على اللى فيا

وقولك يا حبيبى بعدك ...................... عمل ايه فيا .

كانت ايام ترجعنى للحنين ............وايام تعدى بيا سنين

وفبعدك يا حبيبى نسيت طعم الفرح ...

وفبعدك يا حبيبى قلبى داب وانجرح ...

وسهرت الليل حبيبى واتمنيت ترجع ليا ..

واضمك بين اديا واحكيلك على اللى فيا .....

وقولك يا حبيبى بعدك عمل ايه فيا ....

لكن لما عنيك جات فى عنيه ...وشفت عنيك حبيبى نسيت كل اللى فيا .......

شفت حبيبى بعدك عمل ايه فيا .......

ونفسى اضمك يا حبيبى بين اديا ....

يا رب تعجبكم ...وبصراحة انا مش شاعرة ..بس احب اسمع رايكم بصراحة . وشكراً

ايه ده فى بيتنا شاعره
ايه الحلاوة دى
الكلام جميل جدا يا ميما
ومستنين المزيد منك

علي فكره الكلامات جميله ومعبره

بس حاجه زي دي عمرها ما حيكون ليها قيمه

الا اذا صوتي غناه

وان شاء الله استني الاغنيه دي في الالبوم بتاعي الجديد

تأمر يا أخى احمد بس تدفع كام .دى مجهود برضه

معقول هتعيش وتسيب قلبى وهتروح لبعيد
قلبى اللى فجأه فى ليله ويوم لقى نفسه وحيد
انسى انك تلقى حنانه فى يوم مع قلب جديد

ميما اولا الكلمات روعة بشكرك
بس انا عايز انبهك للجريمة اللى انتى هتعمليها لو خليتى احمد يغنيها
ههههههههههههههههههههههههههههههههه

بشكركم جميعاً يا اخوانى وانا مبسوطة كتير ان اللى كتبته عجبكم ........واحب اقول ليك ياhaehassan ان انا مش حدى أحمد الكلمات بتعتى اللى لما اختبر صوته ....هو انا مستغنية عن اغنيتى ولا ايه ههههههههههه ..

علي فكره انتوا اللي هتخسروا

وبعدين مش كفايه اني هتنازل وهغني لهواه وانا راجل محترف

ماشى يا استاذ محترف .......ماشريطك مليا البلد

ايه ده شامم كده والله اعلم ريحه سخريه

بس معلش اللي ما يعرفني يجهلني

وعلي العموم كل مطرب فينا لازم يواحه الصعوبات علشان يوصل

سخرية ايه لا عيب حد جاب سيرة سخرية دى حقيقة ولا ايه ....انت رجل محترف ايش جابنا ليك بس .....هههههههه

على فكرة انا قربت اعرفك هو مش انت اللى غنيت اغنية
هبطل السجاير من اول يناير او تقريبا فبراير مش متأكد من الاغنية الصراحه

اه منا بقول سخريه محدش مصدقني

بس انا عاوز اعرف كل واحد بيشكك في موهبتي يعرف

ان احمد زويل لما راح امريكا اتهاجم
محمد ابوتريكه بيشتم ويتهاجم

ميدو لما احترف بره اتهاجم

عمرو دياب كانوا بيقولوا عليه صوته وحش

فطبيعي جدا ان انا اتهاجم

زي منتا عارف انا اعداء النجاح كتيييييييييير

دعونا نعمل في صمت

لا لا لا لا شاعرة فالمنتدى و احنا مش داريين بجد جامدة يا ميما و أحييكي بحرارة و عنف Very Happy

أحمد جمال انا شخصيا مستنية سي دي و ان شاء الله حيكسر الدنيا ههههههههههههه بس اياك بقى تنسانا لما تتشهر ههههههههههههههه

علي فكره انا مش بعمل سي دي
انا بعمل اسطوانات

احمد جمال كتب:

على فكرة انا من زمان وانا عارف ان احمد فنان مبدع

وانا عمري ما انسى ساعة ما كان بيغني في حفلة كنت والله الواد مبدع بس يا خسارة مش واخد فرصته

وكمان الراجل عمل اللي عليه ووافق انه يغني لشعراء لسه مش معروفين مع اني بانصحه يتجه للعالمية
لانه مش محتاج انه يبتدي صغير لانه اصلا كبير
وكفاية عليكوا كده وبكرة الزمن يسبت كلامي لما تلفوا وراه بالايام علشان تتصوروا معاه وساعتها بقى ولا هيعبركم

وانا باقول برده يا احمد لو لا قدر الله والبومك الجديد ما نجحش وده شئ مستحيل طبعا

اشتغل معلق رياضي في الدوري الاسباني دانت عليك فان نسلتروي مالهاش حل ؟

اوعى حد يشتمني؟)!؟)

كلمات حلوة يا استاذة ميما الله ينور
وهتبقي أحلى لو احمد غناها
وهتبقي أجمل لو انا لحنتها ووزعتها
وهتبقي مية مية لو محدش سمعها
احنا بردوا ناس بتخاف علي المواطنين هههههههه

تسلم ايدك يا ميما كلام جميل وجامد
اما بالنسبه لاحمد فمفيش حد مقدر موهبته
لانه فنان بجد وعلى فكره يا جماعه
السى دى نزل النهارده السوق وتصدقوا كل النسخ اتباعت
بس للاسف مفهوش اغنيه ميما بسب الاختلاف على المقابل المادى
لان احمد عرض 50 وميما اصرت على 25

» خلاص ...تأليف ميما
» شبكة "سكاي" تواصل نقلها للدوري الإنكليزي
» زكي أفضل لاعب في لقاء بولتون وتقرير يصفه "ببابا نويل"
» "يوم تبيض وجوه وتسود وجوه
» ميما جات ..يلا ترحيب بقى....